Revokasyon
Posté le 10 mai 2023 • 2 min de lecture • 216 motsLòt fason pou yon moun pa travay ankò nan Leta.
Lòt fason karyè yon fonksyonè pran bout se revokasyon. Gen 3 motif pou revokasyon yon fonksyonè:
- Abandon pòs
- Kondanasyon a yon pèn kriminèl
- Nan ka anrichisman ilisit
Lisansiman ak revokasyon pa menm nan fonksyon piblik ayisyen an, menmsi yo toude bay menm rezilta ki se sesasyon definitif fonksyon an, yo chak gen motif pa yo.
Pou revokasyon yon fonksyonè, gen 3 motif jan nou wè sa, abandon pòs, kondanasyon a yon pèn kriminèl epi anrichisman ilisit. Kontrèman ak sa anpil fonksyonè panse, abandon pòs la pa koresponn a 3 jou absans sèlman.
Atik 120 dekrè sou fonksyon piblik la, sèl atik ki pale sou kesyon 3 jou a, egzije yon pyès jistifikatif (sètifika medikal) apati 3 jou absans (72h) men li pa di apati delè sa yo dwe revoke fonksyonè a pou abandon pòs. Sepandan si absans fonksyonè a enjistifye e si malgre yon mizandemè ki fikse delè limit pou l reprann fonksyon l li pa prezante, administrasyon an ka soumèt dosye revokasyon l ak pyès sa yo:
- kopi lèt mizandemè,
- kopi lis prezans
- epi avi sesasyon.
Si yon fonksyonè kondane a yon pèn kriminèl oubyen si li rekonèt koupab anrichisman ilisit, yo dwe revoke l selon lalwa, dosye revokasyon an ap gen: kopi desizyon lajistis ak avi sesasyon.